1-сыныпқа балаларды қабылдау

1-сыныпқа балаларды қабылдау үшін құжаттарды тапсыру OQU Ұлттық білім беру платформасы арқылы egov.kz электрондық үкімет порталы негізінде жүзеге асырылады.

Өтініш беру бойынша толық бейненұсқаулық келесі сілтеме бойынша қолжетімді:
https://www.youtube.com/watch?v=r6rVyvHYySg

Құжаттарды тапсырар алдында бейненұсқаулықпен алдын ала танысып шығу ұсынылады.

1-қадам. Қызметке өту

egov.kz порталына кіріңіз.

Келесі бөлімдерді таңдаңыз:
«Білім беру» → «Орта білім беру» → «1-сыныпқа қабылдау үшін құжаттарды қабылдау».

«Онлайн қызметке тапсырыс беру» батырмасын басыңыз.

2-қадам. Авторизациядан өту

Авторизацияны келесі тәсілдердің бірі арқылы жүзеге асырыңыз:

• ҚР ҰКО ЭЦҚ көмегімен;
• eGov Mobile қосымшасындағы QR-код арқылы.

Азаматтардың мобильді базасында тіркелген телефон нөміріне бес таңбалы растау коды бар SMS-хабарлама келеді.

Алынған кодты енгізіп, «Жүйеге кіру» батырмасын басыңыз.

Көрсетілген телефон нөмірінің дұрыстығын растаңыз.

Пайдаланушы келісімімен танысып, дербес деректерді жинауға және өңдеуге келісім беріңіз.

Телефон нөміріңізге 1414 нөмірінен дербес деректерге қол жеткізуге рұқсат беру туралы SMS-хабарлама келеді.

Жұмысты жалғастыру үшін SMS-хабарламаға 511 санын жіберу қажет.

Жауап жіберілгеннен кейін «Келесі» батырмасын басыңыз.

Маңызды!

Жауап SMS-хабарлама келген сол телефон нөмірінен жіберілуі тиіс.

Егер SMS-хабарлама келмесе, мобильді байланыстың бар екендігін, Азаматтардың мобильді базасындағы телефон нөмірінің дұрыстығын тексеріп, 1414 нөмірінің бұғатталған контактілер тізімінде (қара тізімде) жоқ екеніне көз жеткізіңіз.

3-қадам. Бала туралы мәліметтерді алу

Келісім берілгеннен кейін жүйе «Дербес деректерді өңдеуге сұраныс» терезесін көрсетеді.

Тізімнен баланы таңдаңыз.

«Сұранысты жіберу» батырмасын басыңыз.

Телефон нөміріне 1414 нөмірінен баланың дербес деректеріне қол жеткізуді растау үшін қосымша SMS-хабарлама келеді.

Жұмысты жалғастыру үшін жауап SMS-хабарламасы арқылы келісім беріңіз.

Келісім алынғаннан кейін «Келесі» батырмасын басыңыз.

Маңызды!

Егер бала туралы мәліметтер тізімде көрсетілмесе немесе қате көрсетілсе, мемлекеттік сервистер арқылы деректерді өзектендіріп, сұранысты қайта жіберу қажет.

4-қадам. Өтініш беруші мен бала туралы мәліметтерді толтыру

Өтініш түрі ретінде «1-сыныпқа қабылдау» қызметін таңдаңыз.

Өтініш беруші туралы мәліметтерді тексеріңіз:

• ата-анасының (заңды өкілінің) ЖСН-і;
• ата-анасының Т.А.Ә.;
• байланыс телефоны;
• қосымша телефон нөмірі (бар болса).

Тізімнен баланы таңдаңыз.

Егер баланың ерекше білім беру қажеттіліктері болса, «Ерекше білім беру қажеттіліктері бар бала» белгісін қойыңыз.

«Келесі қадамға өту» батырмасын басыңыз.

5-қадам. Білім беру ұйымын таңдау

Мектепті таңдау тәсілін көрсетіңіз:

• Иә — мектепті қызмет көрсету аумағы (шағынаудан) бойынша таңдау;
• Жоқ — мектепті қызмет көрсету аумағынан тыс таңдау.

Автоматты түрде толтырылған деректерді тексеріңіз:

• оқу нысаны — күндізгі;
• оқу жылы — 2026–2027;
• сынып — 1.

Кезекпен таңдаңыз:

• облыс / қала;
• аудан;
• ауылдық округ / әкімшілік (бар болса);
• елді мекен;
• білім беру ұйымы.

Оқыту тілін таңдаңыз:

• қазақ тілі;
• орыс тілі.

Қажет болған жағдайда «Тегін тасымалдау қызметі қажет» белгісін қойыңыз.

«Келесі қадамға өту» батырмасын басыңыз.

Маңызды!

Мектепке қабылдау кезінде басым құқық мектептің қызмет көрсету аумағында (шағынауданда) тұратын балаларға беріледі.

Қызмет көрсету аумағынан тыс өтініш берген жағдайда қабылдау бос орындар болған кезде жүзеге асырылады.

Қабылдау «3:1» қағидаты бойынша жүргізіледі: үш орын шағынаудан балаларына, бір орын шағынауданнан тыс балаларға беріледі.

6-қадам. Құжаттарды жүктеу

«Құжаттарды жүктеу» бөлімінде балаға қатысты құжаттарды тіркеу қажет.

Баланың фотосуреті

Өлшемі 3×4 болатын баланың фотосуретін жүктеңіз.

Рұқсат етілген файл форматтары:

• PDF;
• JPG;
• JPEG.

Файлдың ең жоғары көлемі — 5 МБ.

Медициналық құжаттар

Қазақстан Республикасы Денсаулық сақтау министрлігінің ақпараттық жүйелерінен келесі құжаттар бойынша мәліметтер автоматты түрде жүктеледі:

• №065/у нысаны «Профилактикалық екпелер картасы»;
• №052-2/у нысаны «Баланың денсаулық паспорты».

Егер мәліметтер мемлекеттік ақпараттық жүйелерде болса, олар автоматты түрде көрсетіледі.

Егер мәліметтер табылмаса, тиісті құжаттарды электрондық түрде өзіңіз жүктеуіңіз қажет.

Мәліметтердің дұрыстығын растау

Өтінішті жіберер алдында келесі белгілерді қою қажет:

☑ Ұсынылған мәліметтердің дұрыстығы үшін құқықтық жауапкершілікті өз мойныма аламын.

☑ Мемлекеттік қызметті алу мақсатында сыртқы жүйелерден алынған дербес деректерімді пайдалануға келісім беремін.

Құжаттарды жүктеп, келісімді растағаннан кейін «Келесі қадамға өту» батырмасын басыңыз.

7-қадам. Өтінішті тексеру және қол қою

Толтырылған мәліметтердің дұрыстығын тексеріңіз.

Өтінішке келесі тәсілдердің бірі арқылы қол қойыңыз:

• ҚР ҰКО ЭЦҚ көмегімен;
• eGov Mobile қосымшасындағы QR-код арқылы.

Өтінішті қарауға жіберіңіз.

Нәтижені алу

Мемлекеттік қызмет көрсету мерзімі — 1 жұмыс күні.

Өтініштің мәртебесін egov.kz порталындағы жеке кабинеттен «Қызметтерді алу тарихы» бөлімінде бақылауға болады.

Бас тарту негіздері

Мемлекеттік қызмет көрсетуден келесі жағдайларда бас тартылуы мүмкін:

• ұсынылған құжаттардың және (немесе) мәліметтердің шындыққа сәйкес келмеуі анықталған жағдайда;
• ұсынылған құжаттардың Қазақстан Республикасы заңнамасының талаптарына сәйкес келмеуі;
• білім беру ұйымында бос орындардың болмауы.

Қосымша ақпарат

Өтініш беру үшін заңды өкілдің тұрақты немесе уақытша тіркеуі болуы қажет.

Егер egov.kz порталы арқылы өтініш беру мүмкіндігі болмаса, құжаттарды білім беру ұйымына қағаз түрінде тікелей тапсыруға болады.

Құжаттарды қабылдау мәселелері бойынша ата-аналар білім беру ұйымына немесе тұрғылықты жері бойынша аудандық білім бөліміне жүгіне алады.